Hver á að greiða sektina?

Hver á að greiða tvö hundruð milljónir af þeim fjögur hundruð og fimmtíu milljónum sem Skeljungi var gert að greiða fyrir ólögmætt verðsamráð? Þetta er spurning sem Félag íslenskra bifreiðaeigenda hefur velt upp í kjölfarið á ársskýrslu Haga, móðurfélags Skeljungs. Í ársskýrslunni kemur fram að Hagar, móðurfélag Skeljungs, hefur aðeins fært til gjalda tvö hundruð og fimmtíu milljónir af þeim fjögur hundruð og fimmtíu milljónum króna sem félaginu var gert að greiða fyrir meint brot á samkeppnislögum. Í ársskýrslunni segir að 200 milljónirnar hafi ekki verið færðar til gjalda þar sem fyrri eigendur félagsins beri ábyrgð á þeim. Því hafi félagið í hyggju að áfrýja niðurstöðunni til dómstóla. Ekki liggi fyrir hvaða áhrif áfrýjunin muni hafa á rekstur og fjárhagsstöðu félagsins. Í tilkynningu frá Félagi íslenskra bifreiðaeigenda segir að ekki sé einfalt að skera úr um hver eigi að greiða milljónirnar tvö hundruð ef Hagar, eða Skeljungur, standa ekki skil á þeim. Við skulum fara yfir eigendasögu Skeljungs síðustu árin. Meðan hið meinta ólögmæta verðsamráð stóð yfir var Skeljungur fyrst í eigu afkomenda Hallgríms Benediktssonar, Sjóvár, Eimskipafélagsins, Shell International og fleiri. Í byrjun ágúst 2003 voru Kaupþing Búnaðarbanki, Burðarás og Sjóvá Almennar tryggingar orðnir stærstu eigendur Skeljungs með um níutíu prósenta hlut. Þessi félög höfðu stofnað sameiginlegt félag, Steinhóla ehf. um eignarhlutinn í Skeljungi. Í framhaldinu var öðrum hluthöfum gert yfirtökutilboð. Nokkru seinna tók Fengur fjárfestingafélag, sem Pálmi Haraldsson fer fyrir, yfir meirihluta í Skeljungi og svo á síðasta ári var félagið sameinað Högum sem meðal annars rekur Bónus, Hagkaup, 10-11 og fleiri verslanir. Það er því spurning hver verður krafinn um 200 milljónirnar og hver verður krafinn um þær eða fær þær greidda til baka þegar niðurstaða dómstóla liggur fyrir.