Ég segi það sem mér sýnist

Arsene Wenger tekur ekki vel í friðarumleitanir Jose Mourinho í "Stjórastríðinu" sem þeir hafa háð undanfarna daga og segist ekki verða kúgaður til að biðjast afsökunar á einhverju sem hann hafi ekki gert.

Mourinho sagðist í gær vera tilbúinn til að biðjast afsökunar á því að hafa kallað Wenger gluggagægir, en aðeins ef hann bæðist afsökunar á því sem hann hefði sagt ljótt um lið Chelsea.

Wenger blæs á þessháttar friðarumleitanir og segist ekki kæra sig um að láta stjórna sér. "Fyrir mér er þetta mál úr sögunni og ég tapa engum svefni yfir því. Ég læt ekki segja mér fyrir verkum og segi það sem ég vil um Chelsea eða hvað annað lið," sagði hann.