Carlos hló að meiðslum mínum

Miðjumaðurinn Valdo hjá Osasuna í spænsku úrvalsdeildinni í knattspyrnu og fyrrum leikmaður Real Madrid, var ekki sáttur við fyrrum félaga sinn Roberto Carlos eftir leik liðanna um helgina. Carlos meiddi Valdo illa og hló svo að honum þegar hann þurfti að fara meiddur af velli.

"Ég skil ekki þessa illgirni í Carlos," sagði Valdo. "Hann tæklaði mig svo illa að ég meiddist alvarlega og svo hló hann að mér þegar ég þurfti að fara meiddur af velli og sagði mér að hann mundi taka hina löppina næst. Ég þurfti að hemja mig til að ráðast ekki á hann. Roberto Carlos hefur breyst mikið á síðustu árum og ekki til hins betra," sagði Valdo hundfúll, en hann verður lengi frá keppni vegna meiðsla sinna.