Zlatan fór í tattú í gær

Framherjinn Zlatan Ibrahimovic virðist ekki hafa stórar áhyggjur af leiknum við Íslendinga í dag, því í gær fór hann ásamt vini sínum í sænska landsliðinu og fékk sér húðflúr í Stokkhólmi. Húðflúrið er á maganum á honum og segir; "Aðeins Guð getur dæmt mig." Þetta kemur fram í Aftonbladet í dag og þykir Svíum þetta uppátæki ekki mjög sniðugt, enda þurfa menn að hafa sérstakar umbúðir á húðflúrum í að minnsta kosti viku eftir að þau eru gerð. Skipta þarf reglulega um umbúðir og bera á þau sérstök smyrsl, því sýkingarhættan er mikil. Af þessu má lesa að Zlatan og félagar virðast ekki hafa miklar áhyggjur af leiknum við Íslendinga í dag og nú er bara að sjá hvort Zlatan treystir sér til að slást við íslensku varnarmennina með umbúðirnar á maganum. >