Hermenn fá gervihné Össurar

Fjallað var um nýtt og háþróað gervihné gervilima- og stoðtækjafyrirtækisins Össurar í úttekt Los Angeles Times síðasta föstudag um stuðning stjórnvalda í Bandaríkjunum við hermenn sem tapað hafa útlim í Íraksstríðinu.

Fram kemur í umfjöllun LA Times að Bandaríkjaher sé umhugað um að fá slasaða hermenn aftur til starfa en til að af því geti orðið þurfa þeir á bestu mögulegu hjálpartækjum og tólum að halda. Meðal þess sem herinn vill nýta eru hátæknivörur Össurar, til að mynda nýjasta útgáfa gervihnés fyrirtækisins, Power Knee, sem kynnt var skömmu fyrir áramót. Það er búið gervigreind og líkir eftir vöðvahreyfingum útlimsins og hjálpar þannig viðkomandi til dæmis við að ganga upp stiga og nálgast þá hreyfigetu sem ófatlaðir hafa.

Samkvæmt upplýsingum Össurar hefur Walter Reed-stofnunin, en það er spítali sem tekur á móti bandarískum hermönnum sem koma frá Írak, þegar óskað eftir að kaupa nokkur Power Knee-gervihné þegar það kemur á markað síðar á árinu. Hvert hné mun kosta 57.000 bandaríkjadali, eða nálægt fjórum milljónum króna.

Í grein LA Times er sagt eðlilegt að stjórnvöld útvegi þeim sem fórna sér fyrir landið í stríðsrekstri bestu fáanlegu lausnir og fái aftur til starfa menn sem mikill kostnaður hefur verið lagður í að þjálfa og mennta.