Ísraelar handtaka Palestínuþingmenn

Ísraelski herinn handtók í gær á Vesturbakkanum tugi palestínskra þingmanna úr Hamas-samtökunum, þar á meðal sjö ráðherra úr Palestínustjórn. Einnig héldu ísraelskir hermenn áfram aðgerðum sínum á Gaza-svæðinu til þess að þrýsta á að ísraelskur hermaður, sem Palestínumenn handtóku á sunnudag, verði látinn laus.

Hins vegar frestuðu Ísraelar að gera stóra innrás á Gaza-svæðið í gær, og þótti það til marks um að eitthvað hefði miðað í samningaviðræðum um að fá hermanninn lausan.

Hernaður Ísraela hefur til þessa mest beinst að suðurhluta Gaza-svæðisins, þar sem talið er að hinn 19 ára hermaður, sem heitir Gilad Shalit, sé hafður í haldi.

Herskáir hópar Palestínumanna tóku ísraelska hermanninn í sína vörslu á sunnudag, þegar þeir gerðu árás á ísraelska landamærastöð. Á þriðjudaginn hóf ísraelski herinn svo innrás sína á Gaza-strönd með loftárásum og brynvögnum og sú innrás hélt áfram í gær, þrátt fyrir að viðamikilli innrás landhersins úr norðri hafi verið frestað.

Í gær skýrði einn hinna herskáu hópa Palestínumanna, sem stóðu að árásinni á sunnudag, frá því að þeir hefðu tekið 18 ára ísraelskan landnema af lífi, en lík hans fannst grafið á Vesturbakkanum í gær.

Ísraelski herinn sagðist hafa handtekið 64 embættismenn frá Hamas-samtökunum í gærmorgun á Vesturbakkanum, þar á meðal aðstoðarforsætisráðherra Palestínustjórnar, sjö aðra ráðherra og tuttugu þingmenn.

Ísraelar segja þessar handtökur eingöngu gerðar til þess að draga úr getu Hamas-samtakanna til þess að ráðast á Ísraela, en Yair Naveh, yfirmaður í ísraelska hernum, viðurkenndi að til greina kæmi að láta þessa Palestínumenn lausa í skiptum fyrir ísraelska hermanninn, sem Palestínumenn hafa í haldi.

Palestínumenn voru ævareiðir þessum handtökum. Við höfum enga stjórn, ekki neitt, sagði Saeb Erekat, sem er í flokki með hinum hófsamari Mahmoud Abbas forseta. Þetta er algjörlega óþolandi og við krefjumst þess að þeir verði látnir lausir þegar í stað.