Afkoma Straums Burðaráss vel yfir spám

Hafliði Helgason

skrifar

Hagnaður Straums Burðaráss fjárfestingarbanka eftir skatta á öðrum ársfjórðungi nam 307 milljónum króna. Afkoman er mun betri en spár bankanna gerðu ráð fyrir en allir spáðu þeir tapi á rekstri Straums á ársfjórðungnum á bilinu 1,4 til 3,1 milljarðs króna. Hagnaður annars ársfjórðungs í fyrra nam þremur milljörðum en nítján á þeim fyrsta.

Straumur hefur verið umsvifamikill á innlendum markaði og á Norðurlöndunum, en hlutabréfamarkaðir hér og á Norðurlöndum hafa gáfu lítið af sér á fjórðungnum. Friðrik Jóhannsson sem nýverið tók við stjórn bankans segir uppgjörið gott. "Það er ánægjulegt að sjá hagnað á fjórðungnum þrátt fyrir skarpa lækkun á helstu mörkuðum." Hann segir þetta staðfestingu á stefnu bankans að leggja áherslu á að efla aðra tekjustofna en gengishagnað hlutabréfa. "Vaxta- og þóknunartekjur eru rúmir 5,3 milljarðar á fyrstu sex mánuðum ársins sem er fjórfaldur rekstrarkostnaður bankans á tímabilinu."

Greiningardeild KB banka velti vöngum yfir því hvort viðskiptavild vegna sameiningar Straums og Burðaráss yrðir afskrifuð, en Friðrik segir ekki um slíka afskrift að ræða í uppgjörinu. Gera má ráð fyrir að viðskiptavildin sé metin þannig að við sameiningu sé bankinn í stakk búinn til takast á við stærri og viðameiri verkefni.

Ljóst er að bankinn er mjög sterkur með ríflega 128 milljarða í eigin fé og eiginfjárhlutfall á CAD grunni er 31,7% sem gefur svigrúm til töluverðrar lánastarfsemi til viðbótar. "Það er ljóst að staða bankans er sterk."

Milli fyrsta og annars ársfjórðungs drógust fjárfestingartekjur verulega saman. Liðurinn aðrar fjárfestingartekjur gaf rúma sautján milljarða af sér á fyrsta ársfjórðungi en afkoman af þeirri starfsemi var neikvæð um fimm milljarða á öðrum ársfjórðungi.

Hreinar vaxtatekjur námu tæpum 1.400 milljónum á öðrum ársfjórðungi samanborið við tæpar fimm hundruð á þeim fyrsta. Straumur hagnaðist á veikingu krónunnar bæði á fyrsta og öðrum ársfjórðungi.