Mínus tvö stig í síðustu fimm leikjum

Eftir afar gott gengi í fyrri hluta móts í sænsku úrvalsdeildinni hefur Stokkhólmsliðið Hammarby ekki náð sér á strik á undanförnum vikum. Auk þess sem leikur liðsins gegn Djur­gården var blásinn af í síðasta mánuði vegna óláta áhorfenda hefur liðið nú ekki unnið síðustu fimm leiki í röð og tapað fjórum þeirra. Hammarby var lengi vel í efsta sæti deildarinnar framan af sumri en er nú fallið í sjötta sæti. Til að bæta gráu á svart voru þrjú stig dregin af liðinu vegna fyrrnefndra óláta.

"Það var mjög súrt að missa af þessum stigum," sagði Gunnar Þór Gunnarsson í samtali við Fréttablaðið. Hann gekk til liðsins í vor, skömmu áður en tímabilið hófst, og hefur spilað langflesta leiki liðsins. "Þetta þýðir að í síðustu fimm leikjum okkar erum við með mínus tvö stig og það er ótrúlegt miðað við að þetta lið var lengi á toppi deildarinnar. Nú þurfum við að spýta í lófana og það þarf bara að detta á okkur einn sigur til að koma okkur á beinu brautina. Við getum enn náð einhverju af efstu sætunum. En því er ekki að neita að þetta hefur lagst á sálina á leikmönnum."

Gunnar hefur verið frá í síðustu tveimur leikjum vegna meiðsla. "Ég var nú að klára mína fyrstu alvöru fótboltaæfingu í nokkrar vikur en ég tognaði í nára um daginn," sagði Gunnar, sem kveðst afar ánægður með dvölina. "Ég hef náð þeim markmiðum sem ég setti mér fyrir tímabilið, að vera í byrjunarliðinu í meira en helmingi leikjanna. Nú setur maður sér ný markmið og það verður einnig gott að ná heilu undir­búningstímabili með liðinu," sagði Gunnar, sem býst ekki við því að það verði auðvelt að vinna sér sæti í liðinu á nýjan leik.- esá