Línur skerpast í staðlastríðinu

Sérfræðingar hjá bandaríska kvikmyndarisanum Warner Brothers hafa hannað mynddisk sem getur geymt myndir jafnt á DVD, HD-DVD og Blu-Ray sniði.

Þeir sem muna eftir staðlastríðinu á myndbandamarkaðnum þegar barist var um hvort VHS tækni eða Beta yrði ráðandi á áttunda áratug síðustu aldar og vilja uppfæra tækjabúnaðinn geta væntanlega hætt að rífa í hár sitt yfir nýju tækninni því líklegt þykir að nýi diskurinn geti sætt stríðandi aðila á tæknimarkaðnum og komið í veg fyrir að önnur hvor tæknin verði undir í baráttunni.

Á þessum nýja diski verða mismunandi lög fyrir staðlana tvo: eitt fyrir hefðbundinn DVD staðal en hin tvö fyrir HD DVD og Blu-ray staðla. Staðlarnir rúma mismikið gagnamagn en þeir tveir síðastnefndu geta geymt tæplega 10 sinnum meira magn en hefðbundnir DVD-diskar og þykja henta vel fyrir kvikmyndir á hárri upplausn. Diskar á HD DVD staðli geta rúmað allt að 15 gígabæti af gögnum en Blu-Ray 25 gígabæti. Til samanburðar getur hefðbundinn DVD diskur einungis rúmað 4,7 gígabæti af gögnum.

Kvikmyndafyrirtæki í Bandaríkjunum skiptast í tvær fylkingar varðandi tæknina. Flest þeirra styðja Blu-Ray tæknina enda getur hún geymt fleiri gögn. Af þessum sökum hafa einungis þrjú kvikmyndafyrirtæki ákveðið að gefa út mynddiska á HD DVD sniði. Og til að gera málið enn snúnara þá ætlar Microsoft að hafa spilara sem styðja HD DVD tæknina í næstu kynslóð leikjatölva en Sony Blu-Ray. Þetta hefur ekki hjálpað tæknisjúkum leikjatölvunörðum, sem vita ekki í hvorn fótinn þeir eiga að stíga þegar kemur að vangaveltum um kaup á næstu leikjatölvu.

Warner Brothers hefur hins vegar sagt sig úr staðlakeppninni og ætlar að setja fyrsta diskinn af þessari gerð á markað síðar í þessum mánuði.