Gott orðspor í viðskiptum borgar sig

Gunnlaugur Sævar Gunnlaugsson, stjórnarformaður Tryggingamiðstöðvarinnar, var valinn stjórnarformaður Íslands á fimmtudag. Er þetta í fyrsta sinn sem þessi tilnefning fer fram en hún er að frumkvæði fyrirtækisins BoardNews sem hér hélt ráðstefnu um orðspor í viðskiptum. Jón Sigurðsson, viðskipta- og iðnaðarráðherra, afhenti verðlaunin.

Tilgangurinn með verðlaununum er sagður vera að skapa umræðu og vekja athygli á mikilvægi og gæðum stjórnarstarfa, um leið og stuðlað sé að bættu viðskiptasiðferði. Leit að Stjórnarformanni Íslands hófst árið 2005 og var hann að lokum valinn í samráði við fulltrúa háskóla og atvinnnulífsins. Gunnar Eckbo, ritstjóri Board News í Noregi, er sagður aðalhvatamaður að veitingu verðlaunanna hér, en hann hefur haft veg og vanda af vali á stjórnarformanni ársins í Noregi.

Stjórnarformaður ársins var valinn samkvæmt könnun sem var gerð meðal framkvæmdastjóra og stjórnarmanna á Íslandi. Hlaut Gunnlaugur Sævar flest stig í könnuninni en hann hefur gegnt stjórnarformennsku hjá Tryggingamiðstöðinni (TM) í fjögur ár. Á þeim tíma hefur hagnaður félagsins aukist jafnt og þétt og starfsemi erlendis hefur verið aukin. "Ég er mjög þakklátur fyrir þessi verðlaun, þótt ég verði líka að viðurkenna að þegar haft var samband við mig út af þessu kom það mér gjörsamlega í opna skjöldu," sagði Gunnlaugur þegar hann tók við verðlaununum.

Á það er bent að í tíð Gunnlaugs Sævars sem stjórnarformanns hafi Tryggingamiðstöðin sýnt góðan fjárhagslegan árangur, velta hafi aukist um 50 prósent og hagnaður þrefaldast. Gunnlaugur og samstarfsfólk hans í stjórn TM hafa aukið við starfsemina erlendis og með yfirtökunni á Norway Energy and Marine Insurance (NEMI) hefur TM aukið tekjur sínar um nær 100 prósent. TM hefur einnig keypt 5 prósenta hlut í Invik & co AB sem er sænskt trygginga- og fjármálafyrirtæki.

Í ræðu sinni fyrir verðlaunaafhendinguna lagði Jón Sigurðsson, iðnaðar- og viðskiptaráðherra, áherslu á mikilvægi góðs orðspors og kvað okkur Íslendinga ekki síst hafa fundið fyrir mikilvægi þess í erfiðri umræðu um bankana og íslenska hagkerfið fyrr á árinu. "Gott orðspor fyrir góða dómgreind og heiðarleika er þáttur sem flýtt getur fyrir í viðskiptum," segir hann og bætir við: "Gott orðspor borgar sig, bæði beint og óbeint."