Memphis - San Antonio í beinni

Það verður sannkallaður hörkuslagur í beinni útsendingu á NBA TV í nótt þegar Memphis Grizzlies tekur á móti meisturum San Antonio Spurs og hefst leikurinn klukkan eitt eftir miðnætti.

San Antonio er sem stendur í öðru sæti í Vesturdeildinni skammt á eftir Dallas Mavericks, en Memphis tapaði einmitt fyrir Dallas í hörkuleik í gærkvöldi þar sem liðið glutraði niður 19 stiga forskoti í síðari hálfleik. San Antonio hefur unnið 41 leik og tapað aðeins 14, en Memphis hefur unnið 30 leiki og tapað 24.

Tony Parker skorar manna mest í liði San Antonio, tæp 20 stig í leik, en lykilmenn liðsins hafa átt við þrálát meiðsli að stríða í allan vetur. Spánverjinn Pau Gasol er lykilmaður í liði Memphis og skorar rúm 19 stig og hirðir um 9 fráköst. San Antonio hefur unnið báðar fyrri viðureignir liðanna í vetur.