Ætlar að þagga niður í Mourinho

Argentínska undrabarnið Lionel Messi hjá Barcelona ætlar að þagga niður í Jose Mourinho hjá Chelsea í síðari leik liðanna í Meistaradeildinni annað kvöld, en Mourinho ásakaði Messi um leikaraskap eftir fyrri leik liðanna.

"Þetta er stærsti leikur lífs míns og ég ætla mér að þagga niður í Mourinho og hans mönnum á morgun," sagði Messi. "Ég er atvinnumaður í fótbolta en ekki leikari, enda hefur mikið verið sparkað í mig í leikjum vetrarins," sagði hinn 18 ára gamli leikmaður Barcelona.

Mourinho fékk ekki blíðar móttökur þegar Chelsea kom til Barcelona í dag og hrópuðu nokkrir stuðningsmenn Barcelona á hann og hræktu í áttina til hans þegar hann gekk inn í rútuna þegar liðið kom af flugvellinum. Þá hræktu nokkrir í áttina til knattspyrnustjórans umdeilda - en hann svaraði því með því að brosa kaldhæðnislega til þeirra.