Tilraunaskot skekur markaðinn

Tilraunaskot Norður-Kóreumanna í gærkvöldi skók hlutabréfamarkaði í Suður-Kóreu, Japan og í Evrópu. Fjárfestar seldu hlutabréf sín og tryggðu fjármuni sína með kaupum á gulli með þeim afleiðingum að gengi hlutabréfa á mörkuðunum lækkaði nokkuð. Tilraunaskotið er sagt geta haft áhrif á ákvörðun seðlabanka landanna um hækkun stýrivaxta.

Gengi hlutabréfa lækkaði hratt á mörkuðum í Suður-Kóreu og Japan eftir tilraunaskot Norður-Kóreumanna. Markaðurinn jafnaði sig eftir því sem á leið og endaði í lækkun upp á 0,5 til 0,7 prósent.

Sömu sögu er að segja að gengi gjaldmiðla í báðum löndunum.

Gengi gulls hækkaði hins vegar örlítið fyrst í stað en lækkaði þegar á leið.

Þá lækkaði gengi hlutabréfa á helstu mörkuðum í Evrópu um hálf prósentustig en fjárfestar í álfunni bíða viðbragða fjárfesta í Bandaríkjunum við tilraunaskoti Norður-Kóreumanna.

Fjármálasérfræðingar telja tilraunaskotið hafa haft tímabundin áhrif á gengi hlutabréfa.

Nikkei- 225 hlutabréfavísitalan í Japan lækkaði um 0,7 prósent og var þar með endir bundinn á fjögurra daga samfleyta hækkun hennar. Kospi-vísitalan í Suður-Kóreu lækkaði hins vegar um 0,5 prósent.

Talsmaður seðlabanka Suður-Kóreu sagði tilraunaskotið geta haft áhrif á ákvörðun bankanna um hækkun stýrivaxta í vikunni. Fastlega er búist við að seðlabanki Japans hækki stýrivexti í næstu viku en þeir hafa staðið við núll prósent síðastliðin fimm ár.