Forsætisráðherra Íraks krefst ítarlegrar rannsóknar á morðum

Forsætisráðherra Íraks krefst þess að morð bandarískra hermanna á ungri konu og fjölskyldu hennar verði rannsakað ítarlega. Fyrrverandi hermaður hefur verið ákærður fyrir morðin og að hafa nauðgað ungu konunni. Talið er að allt að fjórir hermenn til viðbótar hafi átt þátt í ódæðunum.

Ættingjar fórnarlambanna ræddu málið við fjölmiðla í fyrsta sinn í dag. Frændi þeirra segir vitni fyrst hafa sagt að andspyrnumenn hefðu myrt fjölskylduna en þegar ljóst var í síðustu viku að Bandaríkjamenn væru að rannsaka málið hafi fólk síðan gefið sig fram og sagt aðra sögu. Þetta fólk hafi verið hrætt og því ekki viljað bendla bandaríska hermenn við ódæðin. Fregnir í bandarískum fjölmiðlum hafa hermt að unga stúlkan hafi verið tvítug og hin fórnarlömbin hafi verið foreldra hannar og yngri systir. Vitni segja hana hins vegar hafa verið fimmtán ára.

Steve Green er fyrrverandi hermaður, sem var rekinn úr bandaríska hernum og sagður þjást af persónuleikaröskun. Hann er ákærður í málinu.

Norui al-Maliki, forsætisráðherra Íraks, sagði í dag mikilvægt að rannsaka málið ofan í kjölinn. Nauðsynlegt sé að óháð rannsókn fari fram. Einnig sagði hann rétt að endurskoða friðhelgi fjölþjóðlega herliðsins í Írak.

Kröfur forsætisráðherrans voru gerðar skömmu eftir að bandarískir og íraskir hermenn gerðu áhlaup á sjúkrahús í Ramadi, vestur af höfuðborginni Bagdad, en þar er vígi andspyrnumanna úr hópi súnnía.

Grunur lék á að þaðan væru gerðar árásir á hermenn með sprengjuvörpum eða leyniskyttur kæmu sér þar fyrir.

10 féllu og rúmlega 20 særðust í þremur sprengjuárásum í Bagdad og Mosul í dag. Hátt í 1600 lík munu hafa komið í líkhúsið í miðborg Bagdad í síðasta mánuði og ekki hafa þau verið fleiri síðan til átaka kom í febrúar eftir að sprengjuárás var gerð á helgidóm sjía í Samarra.