Ég fer ekki frá Atletico Madrid

Framherjinn Fernando Torres hjá spænska liðinu Atletico Madrid gaf út sérstaka yfirlýsingu á blaðamannafundi í dag þar sem hann undirstrikaði að hann færi ekki frá félaginu. Þessi frábæri 22 ára gamli framherji hefur verið einhver eftirsóttasti og umtalaðasti leikmaður Evrópu á liðnum árum, en þó hann sé hvað eftir annað orðaður við lið eins og Manchester United, virðist hann ætla að klára ferilinn með uppeldisfélagi sínu.

"Ef ég hefði einhverntímann ætlað að fara frá Atletico, hefði ég verið búinn að því fyrir löngu. Mér líður vel hérna og þó menn séu stanslaust að ræða brottför mína frá Madrid, kem ég alltaf aftur á hverju ári," sagði Torres, sem hefur verið orðaður við Manchester United í allt sumar og talið var að kaupverðið yrði þá í kring um 20 milljónir punda.