Mælir með kaupum á bréfum Alfesca

Greiningardeild KB banka segir uppgjör Alfesca á öðrum fjórðungi ársins hafi verið yfir væntingum og hafi deildin gefið út nýtt verðmat á fyrirtækið.

Í endurskoðuðu verðmati deildarinnar á Alfesca er verðmatsgengið 5,2 krónur á hlut en það 2 prósenta hækkun frá síðasta verðmati. Ennfremur spáir deildin 12 mánaða markgengi (e. Target Price) óbreyttu í 5,4 krónum á hlut. Til samanburðar stóð gengi Alfesca í 4,68 krónum á hlut á markaði við útgáfu verðmatsins og er því 12 mánaða markgengi greiningardeildarinnar rúmlega 15 prósentum hærra.

KB banki mælir vegna þessa með kaupum á hlutabréfum Alfesca.