Stýrivextir hækkaðir um 50 punkta

Seðlabanki Íslands hefur ákveðið að hækka stýrivexti um 50 punkta og verða þeir eftirleiðis 14 prósent. Þetta er 17. vaxtahækkun Seðlabankans frá því vaxtahækkunarferli bankans hófst í maí fyrir tveimur árum og sú sjötta á þessu ári.

Hækkunin er í samræmi við spár greiningardeilda þriggja stærstu viðskiptabankanna sem segja vaxtahækkunarferlið senn á enda.

Greiningardeild Glitnis spáði 50 punkta hækkun í gær en bætti við að þetta verði að líkindum síðasta eða næstsíðasta stýrivaxtahækkun Seðlabankans. Þá spáir deildin því að á næsta vaxtaákvörðunarfundi Seðlabankans í nóvember verði ákveðið að halda stýrivöxtum óbreyttum.

Greiningardeild Landsbankans spáði sömu hækkun í ágústlok og ítrekaði hana á þriðjudag. Er gert ráð fyrir því að háir stýrivextir samfara hjaðnandi verðbólgu á næstu vikum nái að lyfta raunvöxtum á markaði og draga þar með úr innlendri eftirspurn. Gangi það eftir skapist innan fárra mánaða forsendur til að slaka á peningastefnunni á ný.

Næsta ákvörðun bankastjórnar Seðlabanka Íslands um stýrivexti verður að óbreyttu 2. nóvember samhliða útgáfu næsta heftist Peningamála.