Valur kaupir Helga Sigurðsson frá Fram

Knattspyrnudeild Vals hefur gengið frá kaupum á framherjanum Helga Sigurðssyni sem lék með Fram í 1. deildinni á síðustu leiktíð. Heimildir NFS herma að kaupverðið hafi verið allt að 5 milljónir króna, en það hefur ekki fengist staðfest af forráðamönnum félaganna tveggja.

Helgi fór fram á sölu frá Fram fyrir nokkru, en félagið neitaði honum um þá bón. Helgi hafði ekki mætt á æfingar hjá liðinu síðan Ólafur Þórðarson tók við stjórn Safamýrarliðsins, en hann hafði þó ítrekað í samtali við Fréttablaðið að dyr sínar stæðu alltaf opnar fyrir Helga.