Bellamy missir af næsta leik

Vandræðagemlingurinn Craig Bellamy hjá Liverpool mun að öllum líkindum missa af leik Liverpool og Portsmouth í miðri viku eftir að réttarhöld yfir honum í heimaborg hans Cardiff töfðust um nokkurn tíma. Bellamy var tvo daga fyrir rétti í síðustu viku og þarf að eyða þremur dögum þar í þessari viku. Hann er ákærður fyrir líkamsárás.

Rafa Benitez knattspyrnustjóri er vitanlega ekki hrifinn af þessu og segir málið vera farið að taka sinn toll á leikmanninn. Benitez gat þó glatt sig yfir því að félagið gekk í dag frá kaupum á argentínska bakverðinum Emiliano Insua frá Boca Juniors, en hann á að vísu eftir að fá leikheimild með liðinu. Hann er aðeins 17 ára gamall og er sagður mikið efni.