Van der Sar framlengir við United

Markvörðurinn Edwin van der Sar hefur framlengt samning sinn við enska úrvalsdeildarfélagið Manchester United og segir Alex Ferguson knattspyrnustjóri búast við því að Hollendingurinn standi milli stanganna hjá liðinu í að minnsta kosti tvö ár til viðbótar.

"Edwin er hungraður í að spila fyrir félagið og við höfum framlengt samning hans um eitt ár eins og venja er með leikmenn á hans aldri. Ég er ekki frá því að koma hans hingað hafi hleypt nýju lífi í ferilinn hjá honum og það er reyndar oft þannig með markverði þegar þeir eru komnir vel yfir þrítugt. Hann hefur gríðarlega reynslu og er góður maður til að hafa í búningsklefanum," sagði Ferguson og hrósaði skapgerð markvarðarins sem áður hefur t.d. leikið með Juventus og Ajax.