BYRjunar-örðugleikar

Eitthvað virðist nafnbreyting sameinaðra sparisjóða Hafnfirðinga og vélstjóra hafa farið fram hjá sumum viðskiptavinum. Á laugardaginn var nýtt nafn, Byr - sparisjóður, og merki kynnt. Á mánudegi heyrðist hins vegar af viðskiptavini sem kom inn í sinn gamla sparisjóð og stoppaði hissa við. „E... er þetta ekki ennþá banki?" spurði sá og fékk frekar þreytulegt tilsvar um að víst væri það svo.

Spurningin hafði heyrst oftar um daginn. Heldur virtist starfsstúlkan þreytt á vangaveltum um nýtt nafn og kvaðst hafa heyrt margar útgáfur yfir daginn þegar sami viðskiptavinur sagði að sér þætti nafnið „eins og á netagerð".