MBA-nám við Háskólann í Reykjavík

Undanfarin þrjú ár hefur Háskólinn í Reykjavík útskrifað um fimmtíu nemendur árlega úr tveggja ára MBA-námi. Sama verður uppi á teningnum þann 2. júní þegar 52 nemendur sækja prófskírteini sín. Frá upphafi munu þá rétt tæplega 250 manns hafa útskrifast úr náminu.

Umsóknarfrestur fyrir næsta hóp er 29. maí. Fyrri umsóknarfrestur rann út 18. apríl. Umsækjendur þurfa að hafa lokið grunnnámi í háskóla, búa yfir þriggja ára starfsreynslu og hafa góð tök á ensku. Kennt er fimmtudaga, föstudaga og laugardaga aðra hverja viku. Allt námið fer fram á ensku. Gert er ráð fyrir þrjátíu stunda vinnu á viku að meðaltali.

Fyrra árið fylgja allir nemendur sömu stundaskrá. Seinna árið geta nemendur sérhæft sig með því að velja á milli þriggja námsleiða. Námið kostar 2,6 milljónir króna. Innifalið í þeirri upphæð eru öll kennslugögn.