Besta byrjun frá upphafi

Íslenska kvennalandsliðið hefur aldrei byrjað jafn vel í undankeppni stórmóts og nú. Liðið hefur unnið fyrstu þrjá leiki sína og skorað níu mörk án þess að fá á sig neitt.

Ísland hefur reyndar áður unnið fyrstu þrjá leikina í undankeppni, fyrir EM 1995 en þá með markatölunni 6-1. Aðeins þrjú lið voru í þeim riðli og vann Ísland alla leiki sína en tapaði svo fyrir Englandi í umspili um sæti í úrslitakeppninni.

Ísland, Svíþjóð og Úkraína eru einu liðin sem hafa unnið alla sína leiki af þeim sem hafa spilað þrjá leiki til þessa. Svíar hafa verið með mikla yfirburði í sínum leikjum og er með markatöluna 16-0. Úkraína hefur skorað ellefu mörk gegn einu í sínum viðureignum.

Ef Ísland vinnur riðil sinn nú kemst það beint í úrslitakeppnina sem fer fram í Finnlandi árið 2009.