Loksins lágu Danir í því

Vaskir landsliðsmenn sýndu og sönnuðu að lengi lifir í gömlum glæðum á Akureyri um helgina. Íslendingar lögðu Dani á 40 ára afmæli 14-2 leiksins margfræga á Parken. Mikil ánægja ríkti með þennan einstaka viðburð.

Siguróli Kristjánsson skoraði sigurmark Íslands gegn Dönum þremur mínútum fyrir leikslok á Akureyri á laugardaginn. Ekki var um hefðbundinn landsleik að ræða, heldur voru samankomnar gamlar landsliðs­kempur landanna, en leikurinn var lokahnykkur á N1-móti Þórs. Leikið var í tvisvar sinnum 35 mínútur og leyfðar voru frjálsar skiptingar. Leikurinn var skiljanlega mjög rólegur enda flestir leikmenn komnir úr forminu sem þeir voru í á gullaldarárum sínum. Danirnir voru ívið sterkari en nýttu ekki færin og var refsað grimmilega að lokum.

Nokkrir gamlir taktar sáust en samt það John Sivebæk, fyrirliði Dana, sem var hve sprækastur af leikmönnum liðanna. Í leikslok var hann nokkuð sáttur þrátt fyrir tap. „Þetta var athyglisverður leikur, Íslendingar áttu skilið að vinna þó svo að við hefðum fengið færin til að klára leikinn. Íslendingar voru mjög líkamlega sterkir og við vorum kannski ekki jafn undirbúnir fyrir það, og líklega skildi það liðin að í leikslok."

Guðni Bergsson var kampakátur í leikslok og var mjög ánægður með að hafa loksins lagt Dani að velli. „Þetta var frábært, það er alltaf gaman að koma á Akureyrarvöll og ég tala nú ekki um að leggja Dani í leiðinni. Við erum allir orðnir svo gamlir að við erum ekki í eins góðri æfingu og Danirnir því þeir spila reglulega. Við vorum með fleiri skiptimenn þannig að við vorum að skipta meira en þeir sem var eins gott. En það var gaman að vinna þetta og Danirnir voru með léttleikandi og skemmtilegt lið eins og við vissum reyndar."

Atli Eðvaldsson, fyrirliði íslenska liðsins, var eini leikmaður Íslands sem spilaði allan leikinn. Hann var vígreifur í leikslok og bíður spenntur eftir næsta leik. „Þetta var æðislegt. Ég er búinn að bíða í sextán ár eftir þessum leik og vona að það verði ekki sextán ára bið eftir þeim næsta."

Halldór Áskelsson, skipuleggj­andi leiksins, var mjög sáttur við afraksturinn.

„Ég held að þetta hefði ekki getað heppnast betur. Ég er alveg í skýjunum, þetta var frábært, stemningin góð og Akureyrarvöllur sjaldan verið eins mikið á lífi og í kvöld, þetta minnti á gömlu dagana. Þetta er í einu orði sagt frábært, að koma aftur og spila með gömlu félögunum í landsliðinu og er gríðarlega þakklátur fyrir að þessir menn skyldu gefa sér tíma til að koma og gamla stemningin lifir ennþá, rétt eins og sjá má, hópurinn stendur saman og getur gert ýmislegt ennþá."

Sauðkrækingurinn og landsliðsþjálfarinn Eyjólfur Sverrisson var eins og flestir leikmenn Íslands í leiknum mjög sáttur við sitt framlag. ,,Það var virkilega gaman að spila með gömlu félögunum og að byrja á sigri er algjör snilld. Moli kórónaði þetta, kóngurinn á Akureyri, og það gladdi okkur alla. Ég er gjörsamlega búinn, ég spilaði líka á Pollamótinu þannig að það er ekki mikið eftir, en þetta er búið að vera virkilega gaman.“

Siguróli Kristjánsson, markaskorari Íslands, var í skýjunum þegar Fréttablaðið náði tali af honum eftir leik ,,Ólýsanleg tilfinning að skora hérna, hún er frábær og það fyrir framan 4.000 áhorfendur, algjör snilld.“