Gerði tilraun til flugráns

Lögreglan í N'Djamena, höfuðborg Tsjad, handtók í morgun súdanskan mann sem rænt hafði farþegaþotu með 103 innanborðs.

Flugvélin, sem er af gerðinni Boeing 737 og í eigu súdanska Air West-flugfélagsins, var á leiðinni frá Khartoum til Darfur-héraðs þegar maðurinn ruddist inn í stjórnklefa hennar og krafðist þess að flogið yrði til Tsjad. Hann var vopnaður AK-47 árásarriffli en óvíst er hvernig honum tókst að koma vopninu um borð.

Talið er að maðurinn sé eftirlýstur í Súdan og hafi ætlað að leita hælis í franska sendiráðinu í N'Djamena en var í staðinn handtekinn við komuna þangað.