Segist munu binda enda á stríðið í Írak sem forseti

Hillary Clinton, sem hefur boðið sig fram sem forsetaefni demókrata í kosningunum 2008, segist munu binda enda á stríðið í Írak ef hún verði fyrir valinu sem forsetaefni flokksins. Þessu lýsti hún yfir á fundi með átta öðrum sem vonast eftir því að verða forsetaefni demókrata í kosningunum.

Hillary sagði í ræðu á fundinum að ef hún hefði verið forseti árið 2002 hefði hún ekki ráðist inn í Írak. Fjölmargir demókratar á bandaríska þinginu vilja koma í veg fyrir að Bush forseti fái það fjármagn sem hann hefur óskað eftir vegna stríðsins í Íraks en þar sem meirihluti demókrata í öldungadeildinni er tæpur er ekki víst að það takist. Því sagði Hillary að ef ekki tækist að ljúka stríðinu fyrir árið 2009 myndi hún gera það sem forseti.