Ronaldo og Rooney eru bestu félagar

Portúgalinn Cristiano Ronaldo hefur enn einu sinni lýst því yfir að hann og Wayne Rooney séu bestu vinir, þrátt fyrir uppákomuna á HM í Þýskalandi í sumar þar sem Ronaldo virtist eiga þátt í að Rooney var rekinn af leikvelli í viðureign Portúgals og Englands í 8-liða úrslitum. Ronaldo segir vináttu þeirra hafa styrkst eftir atvikið.

"Þrátt fyrir allt sem gerðist eru ég og Wayne ennþá bestu félagar. Ég held að það sjáist líka á hvernig við höfum spilað saman á tímabilinu í vetur. Við erum sem bræður og það sem gerðist á HM hefur styrkt okkar samband," segir Ronaldo.

"Viðbrögðin eftir að hann var rekinn af velli í sumar voru ótrúlega mikil. Það var erfitt um tíma en ég lét það aldrei hafa of mikil áhrif á mig. Allir hjá Manchester United stóðu fast á bakvið mig og studdu mig," segir Ronaldo og bætir við að það séu mikil mistök hjá áhorfendum að baula á sig í leikjum.

"Baulið gerir mig bara betri. Ég kann vel við að skynja fýlu áhorfenda - það þýðir að þeir eru hræddir við mig. HM gerði mig að betri leikmanni," sagði Ronaldo.