Henry hefur það of gott hjá Arsenal

Thierry Henry er ekki á leið frá Arsenal til Ítalíu, að sögn hans fyrrum félaga hjá enska liðinu, Patrick Vieira. Henry og Vieira eru góðir félagar og ræðast reglulega við, en miðjumaðurinn segir að Henry hafi það einfaldlega of gott hjá Arsenal til að geta hugsað sér að fara frá félaginu.

“Við tölum um allt á milli himins og jarðar, en við tölum ekki um framtíð hans,” sagði Vieira. “Ég get hins vegar sagt að hjá Arsenal hefur Henry allt sem hugurinn girnist - stuðning, umburðarlyndi, tillitsemi og frábæran samning. Það er erfitt að sjá fyrir sér að hann yfirgefi það,” sagði Vieira en bætti þó við að ekkert væri útilokað í fótboltanum.

Henry hefur reglulega verið orðaður við sölu frá Arsenal síðustu missari og þá helst til annaðhvort AC Milan eða Inter Milan á Ítalíu.