Bandaríkjamenn ætla ekki að framselja njósnara

Bandaríkjamenn ætla ekki að framselja 26 Bandaríkjamenn til Ítalíu vegna réttarhalda um mannrán. Flestir mannanna eru taldir vera útsendarar CIA en þeir eru sakaðir um að ræna múslímaklerki af götu á Ítalíu, fljúga honum til Egyptalands þar sem klerkurinn segir að hann hafi verið pyntaður.

John Bellinger lögmaður hjá utanríkisráðuneyti Bandaríkjanna átti fund með evrópskum lögfræðiráðgjöfum vegna málsins. Hann sagði á blaðamannafundi í Brussel í dag að ekki hefði enn borist beiðni frá ítölskum yfirvöldum, en mennirnir yrðu ekki framseldir þótt beiðni bærist.

Dómari í Mílanó fyrirskipaði fyrr í mánuðinum að mennirnir skyldu vera við réttarhöldin ásamt ítölskum njósnurum.