Penninn kaupir Tamore í Finnlandi

Penninn hefur keypt allt hlutafé í finnska fyrirtækinu Tamore, sem sérhæfir sig í sölu og dreifingu á skrifstofuvörum. Þetta er eitt stærsta fyrirtæki sinnar tegundar í Finnlandi. Kaupin eru liður í sókn á mörkuðum við Eystrasalt og í Skandinavíu. Velta Tamore var um 33 milljónir evra á síðasta ári, rúmlega 3 milljarðar íslenskra króna. Stofnandi Tamore, Erkki Mattila, lætur af starfi forstjóra en verður nýjum eigendum til ráðgjafar næstu mánuði.

Í tilkynningu frá pennandum er haft eftir Kristni Vilbergssyni, forstjóra Pennans, að fyrirtækinu hafi gengið vel við Eystrasalt og hafi verið tímabært að taka næsta skref. „Að vel athuguðu máli sáum við að kaup á Tamore var sniðugasta leiðin til að komast inn á finnska markaðinn og halda áfram að vaxa á þessu svæði," segir hann.

Um 120 manns starfa hjá Tamore, þar af um helmingur í söludeild. Fyrirtækið býður upp á mjög mikið vöruúrval, alls um 6.500 vöruliði frá um 280 alþjóðlegum birgjum auk þess sem það selur fjölbreytt úrval skrifstofuvara undir eigin vörumerki, Talex. Að sögn nýrra eigenda blasa einnig við tækifæri til að bæta við vörulínuna ýmsum nýjungum sem gefist hafa vel hér heima.

Fyrirtækjaráðgjöf Kaupþings veitti Pennanum ráðgjöf við kaupin sem voru fjármögnuð með lánsfé og eigið fé.