Þeir voru lélegri en ég hélt

Sevilla komst í kvöld loksins í undanúrslitin í spænska konungsbikarnum í knattspyrnu eftir að hafa slegið út granna sína í Real Betis. Liðin léku það sem eftir var leiks þeirra frá því í lok síðasta mánaðar, en honum var frestað eftir að þjálfari Sevilla fékk flösku í höfuðið og rotaðist. Hann gat ekki stillt sig um að senda andstæðingum sínum smá skot eftir leikinn.

Betist náði aldrei að ógna 1-0 forskotinu sem Freddie Kanoute hafði náð fyrir liðið forðum og notaði Ramos þjálfari tækifærið eftir sigurinn og nuddaði salti í sárin hjá Betis. "Ég hélt að þetta yrði erfiður leikur í kvöld, en þeir voru slakir allan leikinn," sagði hann.