Draga má úr útblæstri án óhóflegs kostnaðar

Hægt er að draga úr útblæstri gróðurhúsalofttegunda án þess að kostnaður við aðgerðirnar verði óhóflega mikill. Þetta er niðurstaða sérfræðinganefndar Sameinuðu þjóðanna um loftslagsmál sem fundar í Bangkok í Taílandi. Að mati nefndarinnar myndi kostnaður við aðgerðir til að draga úr losuninni nema um 0,6-2,5 prósent af vergri heimsframleiðslu, allt eftir því hversu róttækar þær væru. Andstaða Kínverja við orðalag ályktunarinnar stóð lengi vel í vegi fyrir að hún yrði samþykkt en undanfarna daga hefur hins vegar sátt náðst um málið.