Eðlishvöt réð viðbrögðum

Kanadamaðurinn sem bjargaði lífi Íslendings í flugslysi í Kanada fyrir tæpri viku segir það eitt hafa komist að í huga hans að draga vini sína úr flaki flugvélarinnar. Eðlishvötin réð viðbrögðum hans.

Íslendingarnir Guðni Rúnar Kristinsson og Davíð Jónsson lögðu af stað á laugardaginn í fjögurra sæta Cessnu 172 frá Pine Meadows flugvelli í norð-vestur Kanada ásamt kanadískum vinum sínum Elliot Malmann og Leuh Gibson. Guðni Rúnar flaug flugvélinni. Hún hrapaði í skóglendi nærri Squamish. Elliot slapp með lítil sem engin meiðsl og dró bæði Davíð og Leuh úr flakinu en þau virtust illa slösuð. Guðni Rúnar lést í slysinu.

Elliot segir það hafa komið sér á óvart hversu snarlega hann hafi brugðist við. Hann muni eftir því sem hann sá en hljóð, tilfinningar og annað séu gleymd. Þegar flugvélin hafi skollið niður hafi blóð streymt í höfuð hans og eðlishvötin ráðið för. Hann hafi ekki getað skilið þau eftir í flakinu. Eldsneyti hafi lekið út um allt. Einn neisti og þá hefði öllu lokið.

Björgunarþyrlur komu á vettvang eftir að Malmann hafði búið um sár Davíðs og Leuh. Þau voru oll hífð um borð. Björgunarmenn sögðu Elliot hafa unnið afrek. Davíð slapp minna meiddur frá slysinu en óttast var í fyrstu. Leah vinkona hans mun einnig hafa sloppið nokkuð vel.

Slysið er enn í rannsókn en samkvæmt sérfróðum er jafnvel talið að flugvélinni hafi verið flogið af leið. Bill Yearwood, rannsóknarmaður bendir á að því lengra sem flogið sé inn í aflokaðan dal þeim mun erfiðara sé að snúa flugvél við.