Hrói höttur á reiðhjóli

Tuttugu og sex ára gamall laganemi við háskólann í Árósum vinnur með náminu við það að stela reiðhjólum. Hann hefur ekkert samviskubit yfir þessum þjófnuðum. Þvert á móti lítur hann á sig sem Hróa hött. Hann steli dýrum reiðhjólum og selji þau fátækum stúdentum fyrir 5000-15000 krónur.

Þjófurinn segir stoltur frá þessu í stúdentablaðinu "Höfrungurinn."

Hinn verðandi lögspekingur segist vera orðinn laginn við að dirka upp lása. Og ef hann getur það ekki á staðnum hendir hann hjólunum aftan í Golfinn sinn. Sem hann keypti raunar fyrir þýfi sitt. Góðir blaðamenn gefa náttúrlega ekki upp heimildarmenn sem þeir tala við í trúnaði.

Allnokkrir nemendur við háskólann í Árósum vildu þó gjarnnan vita hver kauði er. Þeir sakna dýru reiðhjólanna sem þeir fengu að gjöf frá pabba og mömmu eða afa og ömmu, til þess að komast ferða sinna í skólanum.