Kristján Örn áfram í Brann

Kristján Örn Sigurðsson segist vera ánægður í Brann og sér enga ástæðu fyrir því að fara annað.

Þetta segir hann í samtali við Aftenposten í dag. „Það er mjög spennandi ár framundan hjá Brann og mér líkar vel bæði við félagið og borgina. Svo lengi sem ég tel að ég geti bætt mig er það kannski mér í hag að vera áfram. Af hverju ætti ég svo sem að fara?“

Í greininni er gert mikið úr þeirri staðreynd að Kristján Örn lenti í öðru sæti allra leikmanna í deildinni í einkunnagjöf blaðsins. Fyrir tveimur tímabilum lék Kristján í stöðu hægri bakvarðar, en ekki sem miðvörður, og fékk slæma dóma fyrir.