Mannfall hjá Talibönum

Afganskir lögreglumenn felldu 32 uppreisnarmenn í suðurhluta landsins í dag, að sögn yfirvalda. Meðal þeirra voru sjö arabar. Lögreglumennirnir voru á eftirlitsferð þegar á þá var ráðist. Yfirvöld segja að enginn þeirra hafi fallið.

Ef rétt er verður það að teljast nokkur sigur fyrir lögregluna sem hefur átt undir högg að sækja. Lögreglumenn eru illa launaðir og illa búnir tækjum. Þeir eru oft skotmörk Talibana og hundruð þeirra hafa fallið í valinn.

Ofbeldisverkum hefur fjölgað stórlega í Afganistan á þessu ári. Virðist sem Talibönum vaxi sífellt ásmegin þrátt fyrir að hart sé að þeim sótt.