Skellur hjá Sports Direct

Hagnaður Sports Direct, umsvifamestu íþróttavöruverslun Bretlands, nam 85 milljónum punda á síðasta rekstrarári. Þetta jafngildir 12,8 milljörðum íslenskra króna og er helmingi minna en verslunin skilaði árið á undan.

Taka ber fram að um undirliggjandi hagnað fyrirtækisins er að ræða og tekur því ekki tillit til hagnaðar eða taps af sölu á eignum.

Þetta er versta afkoma Sports Direct í 25 ára sögu fyrirtækisins.

Mike Ashley, stofnandi og stærsti hluthafi verslunarinnar, sem jafnframt er eigandi breska knattspyrnuliðsins Newcastle, kennir versnandi aðstæðum í efnahagslífinu um og slæmu veðri í Bretlandi auk þess sem spilar inn í að Englendingar komust ekki inn í EM í knattspyrnu sem er tiltölulega nýlokið. Hann telur útlitið ekki bjart framundan og væntir þess að neytendur haldi að sér höndum.

Sports Direct var skráð á hlutabréfamarkað í febrúar í fyrra en hefur fallið um tæp 80 prósent síðan þá. Þar af hefur gengið fallið um rúm þrettán prósent í dag eftir að afkomutölurnar voru birtar.