Titilvörn Björgvins fer vel af stað

Íslandsmeistarinn Björgvin Sigurbergsson úr GK hóf titilvörn sína á Íslandsmótinu í höggleik með glæsibrag. Mótið hófst í Vestmannaeyjum í morgun en Björgvin kom inn á 66 höggum eða fjórum höggum undir pari.

Miðað við aðstæður er það frábær árangur. „Völlurinn hér í Eyjum er í frábæru ásigkomulagi. Þetta var bara allt frábært fyrir utan jú veðrið sem hefði getað verið betra," sagði Björgvin í samtali við vefsíðuna kylfingur.is.

„Ég held að það verði erfitt að koma inn á betra skori en þetta. En ég spilaði á 66 höggum og það sýnir að það er allt hægt," sagði Björgvin.