Bayern ætlar sér að halda Schweinsteiger

Karl-Heinz Rummenigge, stjórnarformaður Bayern München, segir að félagið ætli sér að gera allt sem í sínu valdi stendur til að halda Bastian Schweinsteiger hjá félaginu.

Schweinsteiger komst ekki að samkomulagi við félagið um nýjan samning í maí síðastliðnum og verða viðræður teknar upp að nýju í lok mánaðarins. Í sumar stóð hann sig vel með þýska landsliðinu á EM er það komst alla leið í úrslitaleikinn.

„Við munum reyna að halda honum," sagði Rummenigge fyrir leik Bayern og Steaua Búkarest í Meistaradeildinni í kvöld.

Franck Ribery hefur haldið Schweinsteiger á bekknum undanfarið og gæti það verið helsta ástæða þess að hann vilji fara frá félaginu. Þar að auki hafa fregnir borist af því að Schweinsteiger hafi verið að sækja ítölskunámskeið.