Giggs: Við áttum skilið að vinna

Fyrirliðinn Ryan Giggs sagði sína menn í Manchester United hafa átt skilið að fara með öll stigin frá Celtic Park í kvöld þegar þeir gerðu 1-1 jafntefli við skoska liðið Celtic.

Giggs var hetja United þegar hann jafnaði leikinn skömmu fyrir leikslok eftir að skoska liðið hafði verið 1-0 yfir frá því Scott McDonald kom því yfir á 13. mínútu.

"Það var kannski ágætt að fá stig út úr þessum leik í ljósi þess að jöfnunarmarkið kom ekki fyrr en í blálokin, en við áttum líklega skilið að vinna þennan leik eins og við spiluðum í síðari hálfleik. Fyrri hálfleikurinn var vonbrigði en sá síðari mun betri. Við vissum að við fengjum okkar færi," sagði Giggs.

United er á toppi riðilsins með 8 stig líkt og Villarreal sem gerði 2-2 jafntefli við Álaborg á útivelli í kvöld. Álaborg og Celtic eru með 2 stig í riðlinum.