Eiður og Xavi sögðu mér að taka vítið

Framherjinn ungi Bojan Krkic hjá Barcelona hafði heppnina með sér í gær þegar hann skoraði loksins mark úr vítaspyrnu í 5-2 sigri liðsins og Sporting í meistaradeildinni.

Hinn ungi Bojan hefur verið gagnrýndur nokkuð að undanförnu en hinn 18 ára gamli piltur fékk gott tækifæri til að ná sér á strik í gær þegar Barcelona fékk vítaspyrnu. Eiður Smári Guðjohnsen og Xavi heimtuðu að hann tæki spyrnuna.

"Þeir Xavi og Eiður sýndu mér mikla umhyggju og þetta endurspeglar mannlegu hlið þeirra. Mér hefur ekki gengið vel að undanförnu en ég fékk að spila í kvöld og náði að skora," sagði Bojan.

Barcelona er öruggt í næstu umferð keppninnar og hefur tryggt sér efsta sætið í riðlinum.