Dómarinn ræður miklu um úrslit leiksins

Arsene Wenger, stjóri Arsenal, segir dómarann eiga eftir að ráða miklu um útkomu úrslitaleiksins í Meistaradeildinni milli Manchester United og Chelsea í kvöld.

Það verður Slóvakinn Lubos Michel sem fær það erfiða verkefni að dæma úrslitaleikinn í kvöld og Wenger reiknar með því að hann gæti átt eftir að ráða miklu um þróun leiksins.

"Leikir eru mikið til að ráðast á ákvörðunum dómara og menn sáu það í undanúrslitunum að sú varð raunin. Þetta ræðst oft á sekúndubrotum, hvort menn eru dæmdir rangstæðir eða ekki - eða hvort dæmt er víti eða ekki. Þessi lið eru bæði með mikla reynslu og eru áþekk að styrkleika, svo þetta verður mjög jafn leikur," sagði Wenger.