Stabæk tapaði fyrir Tromsö

Leikið var í norsku úrvalsdeildinni í gær. Efsta lið deildarinnar, Stabæk, tapaði 2-4 á heimavelli fyrir Tromsö. Veigar Páll Gunnarsson var í liði Stabæk og lagði upp bæði mörk liðsins.

Stabæk er á toppi deildarinnar með 24 stig en Fredrikstad er með 19 stig í öðru sæti og á leik til góða.

Meistarararnir í Brann eru í sjötta sætinu en liðið gerði markalaust jafntefli við botnlið HamKam. Ólafur Örn Bjarnason var í byrjunarliði Brann en Ármann Smári Björnsson á bekknum.

Haraldur Freyr Guðmundsson og félagar í Álasundi gerðu 1-1 jafntefli við Molde og þá léku Indriði Sigurðsson og Theodór Elmar Bjarnason með Lyn sem gerði 1-1 jafntefli við Viking.