KR bikarmeistari eftir stórsigur á Val

Kvennalið KR er bikarmeistari í knattspyrnu annað árið í röð eftir frábæran 4-0 sigur á Íslandsmeisturum Vals í úrslitaleik á Laugardalsvelli.

Hólmfríður Magnúsdóttir var sannarlega hetja dagsins hjá KR en hún skoraði þrennu á afmælisdaginn sinn og átti frábæran leik.

KR hafði yfir 1-0 í hálfleik með marki Hólmfríðar eftir um hálftíma leik, en hún bætti svo við mörkum á 15 mínútna kafla í síðari hálfleiknum. Hrefna Jóhannesdóttir innsiglaði svo sigurinn með marki skömmu fyrir leikslok.

Stórsigur KR gaf ef til vill ekki rétta mynd af gangi leiksins, en sigur KR var engu að síður verðskuldaður. Sannarlega ánægjulegur lokaleikur fyrir Helenu Ólafsdóttur þjálfara sem stýrði KR í síðasta sinn í dag.