Enn eitt sjórán á Aden flóa

Sómalskir sjóræningjar hafa enn látið til skarar skríða á Aden flóa. Að þessu sinni rændu þeir franskri seglfkútu með tveggja manna áhöfn.

Sjóræningjarnir hafa rænt að minnsta kosti þrjátíu skipum það sem af er þessu ári.

Yfirleitt sækjast þeir eftir meðalstórum flutningaskipum, en víla ekki fyrir sér að ráðast á stór olíuflutningaskip. Þeir krefjast svo lausnargjalds bæði fyrir áhöfnina og skipin.

Yfirleitt er lausnargjaldið borgað og ræningjarnir hverfa. Undantekning var frá því síðastliðið sumar þegar sjóræningjarnir rændu öðru frönsku skipi með þrjátíu manns um borð.

Víkingasveit úr franska hernum handtók þá sex sjóræningja og hirti lausnargjaldið af þeim aftur.