Myndaði mömmu í rúminu með kærastanum

Heitasta myndin á netinu þessa dagana er frá hinni 22 ára gömlu bresku stúlku Shelley Buddington.

Hún varð svo reið þegar hún kom að kærastanum sínum og móður sinni í rúminu, að hún smellti af þeim mynd með símanum sínum og setti hana á Facebook sem hún heldur úti.

Shelley vinnur á ölkrá og hafði sloppið úr vinnunni fyrr en hún átti von á. Hún ákvað að koma við hjá mömmu til þess að spjalla.

Illur grunur vaknaði hjá Shelley þegar hún kom inn í anddyrið á húsinu hennar mömmu og sá þar Timberland stígvél númer 9, sem hún kannaðist vel við.

Hinn illi grunur styrktist þegar hún heyrði torkennileg hljóð úr svefnherbergi móður sinnar. Ja, kannski ekkert sérlega torkennileg.

Hún kíkti varlega inn og sá þar mömmu sína og kærastann í heitum atlotum. Öskureið tók hún símann sinn, stillti sér upp í gættinni og smellti mynd rétt í þann mund sem þau sáu hana.

Árangurinn má sjá á meðfylgjandi mynd, þar sem mamma geysist fram úr rúminu til þess að reyna að stöðva myndatökuna.

Mamman, hin 43 ára gamla Lesley Buddington og kærastinn Andrew Blay eru á góðri leið með að verða þekktustu persónur Bretlandseyja.

Og eru ekkert sérlega ánægð með það. Shelley er slétt sama.