Ekki tilbúnir að kyngja klónuðu kjöti

Japanir segja að þeir muni gera sínar eigin rannsóknir á því hvort kjöt af klónuðum skepnum sé hæft til manneldis.

Bandarísk heilbrigðisyfirvöld hafa kveðið upp þann úrskurð að svo sé. Japanir reiða sig mjög á innflutt matvæli, ekki síst frá Bandaríkjunum.

Þeir eru þó ekki tilbúnir að kyngja klónuðu kjöti strax.

Embættismaður í japanska landbúnaðarráðuneytinu sagði í samtali við Reuter fréttastofuna að þeir teldu sig hafa ágætan tíma til stefnu.

Framleiðsla á kjöti af klónuðum skepnum sé enn svo lítil í Bandaríkjunum að það verði tæpast flutt út fyrr en eftir fjögur eða fimm ár.