Klien ráðinn til BMW

Austurríski ökumaðurinn Christian Klien hefur verið ráðinn tilraunaökumaður BMW Sauber liðsins í Formúlu 1. Klien var áður hjá Jaguar og Red Bull á árunum 2004-06 og síðast var hann tilraunaökumaður hjá Honda.

"Við vildum fá til okkar þriðja ökumann sem hefði reynslu í keppnum og Christian hefur hana. Hann getur þá strax stigið inn ef annar ökumaður okkar forfallast," sagði Mario Thiessen, liðsstjóri BMW.

Eistinn Marko Asmer verður annar tilraunaökumaður liðsins, en þeir verða aðalökumönnunum Nick Heidfeld og Robert Kubica til aðstoðar.

Lið BMW ætlar sér stóra hluti í Formúlu 1 á komandi tímabili og hafa talsmenn liðsins þegar lýst því yfir að þeir ætli að blanda sér í baráttuna við Ferrari og McLaren um sigur á mótinu.

BMW hafnaði í öðru sæti í keppni bílasmiða á síðasta keppnistímabili, reyndar 103 stigum á eftir Ferrari, en það var eftir að öll stig voru tekin af liði McLaren vegna njósnamálsins.