Komst hjá hörðum á­rekstri með ótrú­legum við­brögðum

Fyrsta keppnishelgi tímabilsins fór fram í Albert Park í Ástralíu um nýliðna helgi og þar var það lið Mercedes sem hrósaði sigri en aðalökuþór liðsins George Russell endaði í fyrsta sæti og liðsfélagi hans Andrea Kimi Antonelli í því öðru á undan Ferrari ökuþórunum tveimur. 

Miklar breytingar hafa átt sér stað í mótaröðinni milli tímabila og eru bílarnir sem keppt er á núna töluvert frábrugðnir bílum undanfarinna ára. 

Þegar svona stórar breytingar eiga sér stað er hægt að búast við því að liðin lendi í ýmsu brasi í fyrstu keppnum tímabilsins litlu mátti muna að stórslys ætti sér stað við upphaf keppni helgarinnar. 

Bíll Liam Lawson, ökuþórs Racing Bull liðsins, virtist missa afl um stundarsakir eftir að keppnin hafði verið ræst í gær og sat nær í kyrrstöðu eftir á ráslínunni á meðan að aðrir ökuþórar þutu fram hjá honum á sínum bílum. 

Franco Colapinto, ökuþór Alpine liðsins, átti flotta ræsingu í keppninni en var einnig val vakandi. Það sást í ótrúlegum viðbrögðum hans er afar litlu, nær engu, mátti muna að hann æki á fullum hraða beint aftan á bíl Lawson. 

Atvikið sást ekki í beinni útsendingu frá keppninni er það gerðist en var sýnt í ökuþóraherberginu eftir keppni þar sem efstu þrír ökuþórar keppninnar fengu að sjá það í fyrsta sinn. Viðbrögð þeirra voru þau sömu og annarra sem voru að sjá það í fyrsta skipti.