Uppskerubrestur úr sögunni?

Finnskir og bandarískir vísindamenn hafa uppgötvað genasamband plantna sem orðið gæti til þess að uppskerur gætu þolað mikla þurrka.

Vísindamennirnir segjast hafa uppgötvað genið sem stjórnar því hversu mikinn koltvísýring plöntur taka til sín. Þetta sama gen stjórnar því einnig hversu mikinn raka þær gefa frá sér.

Plöntur eiga stóran þátt í því að viðhalda jafnvægi í andrúmsloftinu með því að taka til sín koltvísýring úr loftinu. Í miklum þurrkum geta plöntur misst allt að 95 prósent af rakamagni sínu.

Vísindamenn hafa nú fundið það genasamband sem stjórnar þessari útgufun. Þeir vonast til þess að geta breytt plöntum þannig að þær haldi áfram að taka til sín koltvísýring án þess að missa of mikinn raka. Þannig gætu plöntur lifað á mjög þurrum svæðum.

Bundnar eru vonir við að hægt verði að yfirfæra þessa uppgötvun yfir á fæðuplöntur eins og t.d. hrísgrjón sem myndi hafa mikil áhrif á stóran hóp fólks á jörðinni.